Корчарскиот митрополит Јован најави наскоро воспоставување канонски односи меѓу македонската и албанската црква

Македонскиот амбасадор, Данчо Марковски и претседателот на партијата Македонска алијанса за европска интеграција (МАЕИ), Васил Стерјовски остварија средба и со корчарскиот митрополит Јован.

На средбата посебен акцент беше ставен на канонското признавање на МПЦ-ОА, за што митрополитот изнесе искрени честитки и благослов до македонските верници. Тој најави дека се очекува набрзо да се воспостават канонски односи меѓу Албанската автокефална православна црква (ААПЦ) и Македонската, што ќе овозможи заедничко богослужење на свештеници од двете цркви, изјави Стерјовски за МИА.

Тој додаде дека митрополит Јован и досегашната соработка со МПЦ-ОА ја оценил како многу добра и оти благодарение на тоа свештеници на подрачјето на неговата Митрополија, пред сè во Преспа, службите ги одржуваат на македонски јазик.

Во областа на Преспа, општина Пустец, која се состои од девет села населени со 100 отсто македонско население служба на македонски јазик служат отец Алексо Темелко од село Пустец и отец Ропи Арѓири од село Зрноско. Исто така, овие парохиски намесници, крштеваат и венчаваат на македонски јазик и во црквите во градот Корча за припадниците од македонската заедница кои живеат во градот Корча, додава Стерјовски.