Во неговото родно село Глобочени денеска беше одбележана 112-годишнината од раѓањето на Стерјо Спасе, еден од најзначајните писатели со македонско потекло и еден од основоположниците на современата албанска литература.

По тој повод, делегација на Македонската алијанса за европска интеграција (МАЕИ) положи цвеќе пред бистата на Стерјо Спасе, оддавајќи почит кон неговиот живот и богато книжевно творештво.

Стерјо Спасе (1914–1989) е роден во Глобочени, Преспа, а починал во Тирана. Во текот на својот живот оставил значаен белег во албанската книжевност, но и во зачувувањето и афирмирањето на македонската културна традиција.

Покрај тоа што бил писател, Спасе се занимавал и со антологичарска и преведувачка дејност, бил автор на учебници и собирач на македонски народни умотворби. Неговото творештво претставува значаен мост меѓу македонската и албанската култура.

Од МАЕИ истакнаа дека Глобочени и Преспа со право се горди на својот сограѓанин, чие дело оставило траен печат во културниот и општествениот живот на Албанија.

„Неговото дело нека биде траен потсетник дека културата ги поврзува луѓето, ги надминува границите и живее и тогаш кога генерациите се менуваат“, порачаа од МАЕИ.

Со положувањето цвеќе пред неговата биста, беше оддадена почит кон Стерјо Спасе и неговото трајно книжевно наследство.