Кардиналите почнаа консултации пред изборот на нов папа

Во Рим денеска започнаа консултациите на кардиналите, една седмица пред почетокот на конклавата на 7 мај, на која ќе биде избран нов предводник на Римокатоличката црква, по смртта на папата Франциск на 21 април.

“Атмосферата е многу мирна, ова е момент за дијалог”, изјави денес колумбискиот кардинал Хорхе Енрике Хименес Карвахал.

Тој додаде дека дијалогот е простран и отворен, наведувајќи дека во конклавата “не се зборува за притисок, поларизација или манипулација”. “Се слушаме едни со други, и секој ќе одлучи пред Бога”, рече кардиналот.

Секое утро, околу 200 “принцови на Црквата”, од кои некои претходно никогаш не се сретнале, се собираат во салата Павле VI во Ватикан на општи конгрегации, средби зад затворени врати каде што дискутираат за приоритетите за иднината на институцијата стара 2,000 години. Меѓу нив, 133 кардинали помлади од 80 години ќе партиципираат во конклавата, а двајца кардинали го најавија своето отсуство поради здравствени причини.

Амбиентот е “семеен, пријателски и полн со почит”, изјави аргентинскиот кардинал Анхел Сиксто Роси.

“Слушаме луѓе кои можеби никогаш претходно не сме ги слушнале, и тоа ни дава насоки”, рече шпанскиот кардинал Кристобал Лопез Ромеро, надбискуп на Рабат.

На конклавата ќе бидат потребни две третини од гласовите за да се селектира папа, чие име потоа ќе биде објавено во пораката “Urbi et orbi” (На градот и светот).

На прашањето за можното траење на конклавата, салвадорскиот кардинал Грегорио Роса Чавес рече дека ќе трае “најмногу три дена”. Што се однесува до веројатноста за консензус во континуитет со папата Франциско, салвадорскиот кардинал рече дека тоа е она што тој го чувствува и што се перципира во атмосферата.

Папата Франциск почина на Велигденскиот понеделник, на 21 април, и беше погребан во саботата во базиликата Санта Марија Маџоре.