Скандал во Лерин: Градоначалникот прекина настап на македонска песна (ВИДЕО)

Во Лерин, за време на традиционалната културна манифестација „Ден на огновите“, била прекината изведбата на македонска песна, откако градоначалникот интервенирал при настапот на музичкиот состав „Ентопика“. Настанот предизвика реакции во јавноста и бројни коментари на социјалните мрежи.

Според сведоштвата на присутни граѓани, на манифестацијата биле изведувани повеќе традиционални и современи песни, но кога бендот започнал со изведба на македонската народна песна „Софка на татко“, градоначалникот реагирал и побарал настапот да биде прекинат. Музичарите добиле насока да не продолжуваат со пеење на македонски јазик, туку да ја изведуваат композицијата исклучиво инструментално.

Очевидци наведуваат дека интервенцијата била изненадна и дека дел од публиката реагирала со негодување, додека други присутни ја прифатиле одлуката без коментар. По прекинот, еден од членовите на бендот од бината порачал „Музиката нема граници!“, што било проследено со аплауз и поддршка од дел од присутните.

Снимки и сведоштва од настанот брзо се проширија на социјалните мрежи, отворајќи дебата за слободата на културно изразување и употребата на македонскиот јазик во јавниот простор во Грција. Засега нема официјално соопштение од градските власти во Лерин во врска со причините за прекинот на изведбата.

Настанот се случи во рамки на манифестација која традиционално собира голем број посетители и има за цел промоција на локалната култура и обичаи, што дополнително ја засили јавната реакција околу ваквата интервенција.