Трамп: Путин и Зеленски можат да постигнат мир

Претседателот на САД, Доналд Трамп, изрази уверување дека рускиот претседател Владимир Путин и украинскиот лидер Володимир Зеленски имаат можност да постигнат мир и да стават крај на војната во Украина.

Одговарајќи на новинарско прашање дали би му понудил на Путин пристап до минерали од ретки земји во замена за прекин на конфликтот, Трамп истакна дека утрешната средба со рускиот лидер е „голема и важна“ и може да спаси многу животи.

Тој додаде дека уште поважна би била следната средба, на која покрај него би присуствувале и Путин, Зеленски, како и евентуално европски лидери.

„Ќе видиме дали можат да постигнат договор“, изјави Трамп, нагласувајќи дека верува во можноста за постигнување мир меѓу двата завојувани табора.