Рама оствари средби со Кошта и Мецола во Брисел, во фокус европската интеграција на Албанија

Премиерот на Албанија, Еди Рама оствари средби со претседателот на Европскиот совет, Антонио Кошта, и претседателката на Европскиот парламент, Роберта Мецола, во рамки на неговата посета на Брисел, каде учествува на Форумот за проширување на Европската Унија.

Разговорите се одвиваат во период кога проширувањето на ЕУ повторно е високо на европската политичка агенда, а Албанија продолжува со напорите за напредок во преговорите за членство.

Во фокусот на средбите се европската перспектива на Албанија, напредокот во реформскиот процес, владеењето на правото и спроведувањето на обврските поврзани со пристапните преговори.

Рама учествува и на Форумот за проширување под мотото „Поширока Европа – посилна Европа“, на кој се дискутира за иднината на европското проширување, економскиот раст, инвестициите и реформите во земјите кандидатки.

Средбите со високите претставници на европските институции претставуваат можност за размена на ставови за динамиката на интегративниот процес и поддршката на Европската Унија за продолжување на реформите во Албанија.