Македонски весник Илинден – Makedonski vesnik Ilinden
Денес се навршуваат 107 години од македонското Тиквешко востание против српската окупаторска власт во Македонија! Тиквешкото востание е прв организиран масовен народен вооружен отпор на Македонците против српската власт којашто го окупирала Вардарскиот дел на Македонија по повлекувањето на турските сили по Првата балканска војна.
Востанието започнало на 19 јуни 1913 година во Тиквешијата и траело седум дена. Тиквешкото востание е самостојно дело на Македонците од Тиквешијата, спонтано организирано и раководено од месните дејци, револуционери и војводи на Организацијата, а потпомогнато од четите на ВМРО.
После седум дена Србите испраќаат голема војска предводена од Василие Трбиќ, како и од Јован Бабунски и Јован Долгач. На помош на српската војска се приклучува и башибозукот на Јаја Ага со 250 вооружени души. Тиквешките востаници заедно со четите на војводите Христо Чернопеев и Петар Чаулев се оставени сами да се соочат со српската војска, но не успеваат во своите напори.
Во востанието загинале околу 1.000 Македонци од Тиквешијата, од кои на 500 со сигурност им се знаат имињата. Меѓу нив голем број мажи, жени, деца и старци биле убиени, заклани и живи изгорени. 150 кавадарчани се врзани на колје во центарот на градот и се оставени да висат 30 часа под пеколното сонце, а после тоа заедно со уште 50 други кавадарчани се одведени во месноста Полјаната и стрелани.
Запалени биле над илјада куќи, а околу 2.700 луѓе биле затворени. Српската војска вршела страшен терор и во реонот околу Криволак – колеле луѓе, а во фурни ги гореле децата. Тиквешкото востание долго време беше премолчувано во македонската историографија поради белградските врховисти на власт во Македонија. Вечна им слава и памјат на сите Македонци загинати и ѕверски убиени во Македонското Тиквешко востание… Амин!