Македонски весник Илинден – Makedonski vesnik Ilinden
Започна изборната кампања за Локалните избори 2025. Ќе се гласа на 19 октомври на 3480 избирачки места за 309 градоначалници и 576 советнички листи.
Со полноќ официјално започна дваесетдневната изборна кампања за Локалните избори 2025, кои ќе се одржат на 19 октомври. Кампањата ќе трае до 17 октомври на полноќ, по што следува 24-часовен изборен молк. Вториот круг е закажан за 2 ноември.
Изборниот законик (член 69а) ги регулира сите форми на изборна кампања – од јавни собири, плакати и медиумски претставувања, до дистрибуција на материјали и официјално претставување на кандидатите. Учесниците имаат право да поднесат приговор до ДИК за евентуални неправилности, а одлуките на ДИК можат да бидат оспорени пред Управниот суд. Воедно, ААВМУ е должна да објавува извештаи за медиумското покривање на изборите.
Ова се осмите локални избори од независноста и четврти со избор на градоначалници и советници. Ќе се гласа на 3480 избирачки места за 309 кандидати за градоначалници и 576 советнички листи, што вкупно изнесува 10 490 кандидати. Право на глас имаат 1 832 415 гласачи, од кои 1 717 803 во земјата, додека преостанатите се во странство, во казнено-поправни установи или старски домови. Најмногу кандидати за градоначалник има за Град Скопје – 16.