Македонски весник Илинден – Makedonski vesnik Ilinden
Намалувањето на меѓународниот надзор врз Бугарија би го поткопало кредибилитетот на системот за заштита на човековите права на Советот, бидејќи земјата не ги спроведе одлуките на Европскиот суд за човекови права.
Време е Советот на Европа да ги засили своите напори во заштитата на правата на малцинствата во Бугарија. На 2 декември, Комитетот на министри ќе се состане за да одлучи дали да продолжи со следење на кршењата на правата на малцинствата од страна на Бугарија или да го намали меѓународниот надзор во ова прашање. ЕФА го повикува Комитетот на министри да одржува засилен мониторинг врз Бугарија сè додека не се постигне опипливо и проверливо почитување на правата на малцинствата.
Во ЕФА, ние сме загрижени за состојбата со правата на малцинствата во Бугарија. Земјата продолжува да одбива да ја признае Македонската заедница и да регистрира која било Македонска организација, кршејќи го Член 11 од Европската конвенција за човекови права. Меѓународни тела како што се Европскиот суд за човекови права и самиот Комитет на министри на Советот на Европа постојано препорачуваат да се преземат потребните мерки. Бугарија, исто така, избегнуваше да ги спроведува одлуките донесени од овие институции.
Затоа, „не би го разбрале доколку Советот одлучи за предвремено затворање на мониторингот по ова прашање. Тоа би го поткопало авторитетот на Европскиот суд за човекови права (ЕКЧП) и кредибилитетот на системот за заштита на човековите права на Советот на Европа“, рече потпретседателот на ЕФА, Керем Аптурахим Оглу.
Како стигнавме до тука?
Ситуацијата е особено загрижувачка. Прашањето ќе стигне на масата на Комитетот на министри откако Парламентарното собрание на Советот на Европа (ПАССЕ) одлучи на 1 октомври да го затвори својот пост-мониторинг дијалог со Бугарија и наместо тоа да го разгледа својот напредок во рамките на периодични прегледи. Тоа е резултат на напорите на Бугарија да ја ограничи својата одговорност во врска со правата на Македонците во земјата.
Советот го следеше почитувањето на правата на малцинствата од страна на Бугарија откако ЕКЧП утврди дека правата на македонското малцинство се прекршени: Македонците не беа признати, а македонските организации не беа регистрирани. И покрај дадените препораки, сè уште ниту една македонска организација не е успешно регистрирана. Пример е нашата партија членка на ЕФА, ОМО “Илинден”-Пирин, на која сакаме да ја потврдиме нашата поддршка и нашата посветеност кон правдата, еднаквоста и правата на малцинствата низ цела Европа.
Претседателката на ЕФА, Лорена Лопез де Лакале, изјави: „Според бугарските власти, македонското малцинство не е присутно во Бугарија, не постои. Но, тие бараат целосно признавање, вклучително и слобода на здружување и политичко претставување. Демократските права на политичко постоење на македонското малцинство во Бугарија треба целосно да се почитуваат. Го повикуваме Комитетот на министри на Советот на Европа да ги зголеми своите дипломатски и политички контакти со Бугарија, така што ќе дејствува во согласност со највисоките демократски стандарди утврдени од европските и меѓународните организации.“
За време на пленарната седница на Парламентарното собрание на Советот на Европа (ПАССЕ), известувачите заклучија дека Бугарија не ги исполнила своите обврски во врска со правата на малцинствата. Но, и покрај сите факти и докази, ПССЕ сепак одлучи да го прекине пост-мониторинг дијалогот на Бугарија.
По одлуката на ПССЕ, Комитетот на министри ќе биде тој што ќе го разгледа затворањето на мониторингот на групата случаи од Македонија на 2 декември. „Таа одлука може да оди само во една насока, ако институцијата сака да го задржи својот кредибилитет: да продолжи да ја следи Бугарија сè додека земјата не ги спроведе одлуките на Судот и не обезбеди непречена регистрација на македонските организации“, рече генералниот секретар на ЕФА, Ориол Кејс.
Партиите членки на ЕФА, загрижени од ова прашање и солидарни со Македонската заедница, го издадоа следното соопштение.