Македонски весник Илинден – Makedonski vesnik Ilinden
Летовите ќе се реализираат двапати неделно, секој четврток и недела, а преку виенскиот аеродром патниците од Охрид ќе имаат можност за поврзување со повеќе од 200 летови кон 66 држави.
На Аеродромот „Св. Апостол Павле“ во Охрид утрово слета првиот авион на „Аустријан ерлајнс“, со што официјално почна да функционира новата редовна авиолинија меѓу Виена и Охрид, соопшти министерот за транспорт Александар Николоски.
Новата линија ќе сообраќа двапати неделно, секој четврток и недела, со што Охрид и охридскиот регион добиваат директна воздушна врска со австриската престолнина.
Според Николоски, воведувањето на линијата е значајно за развојот на охридскиот аеродром, имајќи предвид дека аеродромот во Виена претставува еден од најважните воздушни центри во Централна и Источна Европа.
Преку Виена, на патниците ќе им бидат достапни повеќе од 200 конектинг-летови кон 66 држави во Европа, Северна Америка, Азија и Африка.
Министерот посочува дека дополнително значење има и фактот што линијата ја оперира „Аустријан ерлајнс“, што, според него, претставува потврда за сериозноста на инвестицијата и за квалитетот на услугите што ќе им бидат понудени на патниците.
Со отворањето на новата линија, од охридскиот аеродром се реализираат вкупно 16 авиолинии, од кои 13 редовни и три чартер-линии.
Од Министерството очекуваат директната врска со Виена да придонесе за привлекување поголем број странски туристи, нови инвестиции и за економски развој на Охрид и поширокиот регион.
Николоски информира дека како резултат на владините мерки за поддршка досега се отворени 28 нови авиодестинации. Стратешка определба на Владата, како што наведува, е целосно искористување на капацитетите на меѓународните аеродроми во Скопје и Охрид, преку проширување на мрежата на дестинации, привлекување нови авиокомпании и подобрување на услугите за патниците.
Паралелно се спроведува и целосна реконструкција на охридскиот аеродром, која треба да овозможи подобрување на инфраструктурата, унапредување на капацитетите и создавање услови за натамошен раст на бројот на летови и патници.
Целта е во текот на годинава преку двата македонски аеродроми да бидат опслужени повеќе од 3,5 милиони патници, а во наредните години бројката да надмине четири милиони патници.
Според Николоски, финансиската поддршка за привлекување нови авиокомпании и отворање нови линии треба да им овозможи на граѓаните полесно и побрзо патување до европските метрополи, но и да придонесе за развојот на економијата, образованието, културата, здравството и туризмот.