Трибина „80 години од кодификацијата на македонскиот јазик“ во Македонската амбасада во Берлин 

По покана на амбасадорот на Република Македонија во Германија, Н.Е. Илбер Села, претседателот на Централниот Совет на Македонците во Германија, Роберт Кленкоски, учествуваше на свечена дебата по повод 80-годишнината од кодификацијата на македонскиот стандарден јазик, која се одржа во просториите на Амбасадата во Берлин.

На настанот свои излагања имаа и:

• Н.Е. Илбер Села, амбасадор, со воведно обраќање
• Д-р Панче Велков, директор на Музејот на град Скопје
• Ана Смилевска, наставник по дополнителна настава по македонски јазик во Берлин
• Маја Стојановска, претставник на МПЦО „Св. Климент Охридски“ во Берлин, која говореше за улогата на црквата во негувањето на македонскиот јазик

Целосно обраќање на претседателот на Централниот Совет на Македонците во Германија, Роберт Кленкоски

Почитуван амбасадоре, почитувани соговорници, драги пријатели, браќа и сестри Македонци,

Денес се собираме овде, не само да ја одбележиме важната 80-годишнина од кодификацијата на македонскиот стандарден јазик, туку и да се потсетиме на значењето на нашиот јазик за нашето културно и национално постоење. Македонскиот јазик не е само средство за комуникација, тој е основа на нашиот идентитет, на нашата историја, и на нашата врска со Македонија.

Во овој динамичен и глобализиран свет, зачувувањето на јазикот и културата е предизвик, но и наша одговорност. Особено кога сме во странство, како што е случајот со многу од нас тука во Германија, потребата да се негува и пренесува македонскиот јазик на идните генерации станува уште поважна.

Како Централен Совет на Македонците во Германија, ние активно се залагаме за поддршка на нашата заедница. Работиме рамо до рамо со македонските клубови, здруженија и ангажирани поединци, кои го негуваат и пренесуваат македонскиот јазик и култура. Нашата цел е да ги поддржиме проектите кои ја истакнуваат вредноста на нашето наследство и да обезбедиме ресурси за сите оние кои се посветени на овој важен процес.

Со особена почит, сакам да им се заблагодарам на македонските наставници кои денес се тука. Вашиот труд, посветеност и страст за негување на македонскиот јазик кај младите генерации се клучни за опстанокот на нашиот јазик во дијаспората.

Ви благодариме за вашата важна работа и посветеност!

Во оваа важна прилика, дозволете ми да се заблагодарам на Амбасадата на Република Македонија во Берлин, за нивната постојана поддршка и за организирањето на оваа значајна дебата. Заедно, како една заедница, работиме на тоа да ја зачуваме македонската култура и да ја пренесуваме на идните генерации.

Македонскиот јазик е жив, додека го зборуваме и пренесуваме. Но, за да продолжи да живее, мораме сите да се посветиме на него. Патот е долгорочен и полн со предизвици, но верувам дека со нашата заедничка посветеност и љубов, ќе можеме да ја осигуриме иднината на македонскиот јазик и култура. На крај, ви се заблагодарам за вашата посветеност, љубов и поддршка во оваа важна мисија. Заедно, ќе продолжиме да градиме иднина која ќе биде достојна за нашиот народ и нашето наследство.

Да живее македонскиот јазик! Да живее Македонија!