Блокадата кај Либражд ја парализираше границата со Македонија, триесетина камиони заглавени на Ќафасан

Блокадата на патниот правец меѓу Либражд – Прењас поради свлечиште во Драгостуње продолжува да создава сериозни проблеми во сообраќајот кон југоисточна Албанија, парализирајќи го и граничниот сообраќај со Македонија.

Поради уништување на дел од коловозот на рутата Ќафасан – Елбасан, сообраќајот е целосно прекинат, а десетици товарни возила се принудени да чекаат со денови за да ја преминат границата. Според информациите од терен, околу 30 камиони во моментов се задржани на граничниот премин Ќафасан.

Поради прекинот на овој фреквентен патен правец, голем број товарни возила ја пренасочија својата рута преку територијата на  Македонија, што доведе до значително зголемување на протокот на возила и создавање долги редици на граничниот премин.

Албанските власти соопштија дека во последните 24 часа преку Ќафасан во земјата влегле 1.510 лица, додека 1.703 лица ја напуштиле државата, што укажува на зголемена фреквенција како резултат на присилните пренасочувања на сообраќајот.

Надлежните служби работат на проценка на штетите и изнаоѓање решение за нормализирање на сообраќајот, додека возачите и транспортните компании трпат сериозни загуби поради доцнењата. Состојбата останува неизвесна сè додека патниот правец не биде целосно саниран.