Македонија: Денеска се одбележуваат 76 години од депортацијата на македонските Евреи

 

Со повеќе активности денеска во Скопје се одбележуваат 76 години од депортацијата на македонските Евреи, во организација на Еврејската заедница и Фондот на холокаустот. Активностите ќе бидат заокружени со комеморативен концерт во Меморијалниот центар на холокаустот. Министерот за надворешни работи  Никола Димитров, во името на Владата на Република Македонија положи цвеќе на споменикот на 7.144 македонски Евреи кои во 1943 година беа присилно собрани во просториите на тогашниот Монопол и беа испратени во логорот на смртта Треблинка.

Во обраќањето пред присутните, Димитров истакна дека и по 76 години, тагата, болката и огорченоста од монструозниот обид за уништување на еврејскиот народ се вечни.Тој нагласи дека му е особена чест да положи цвеќе пред овој, како што рече, споменик, паметник и светилник: споменик на македонските Евреи жртви на Холокаустот, паметник за најголемото зло во историјата на човештво, светилник што секогаш ќе нè води на вистинскиот пат да го негуваме споменот, да ги едуцираме младите генерации, да истражуваме, да бидеме постојано будни и да се бориме против негирањето и искривоколчувањето на Холокаустот, против антисемитизмот, дискриминацијата и сите други форми на кршење на човековите права.

Advertisement