Македонка меѓу најубавите на изборот на Мис Глоуб 2020 во Тирана

ноември 14, 2020

Вчеравечер во Тирана се одржа изборот за „Мис ГЛОУБ 2020“ со учество на 50 девојки од исто толку држави од целиот свет. Македонија ја претставуваше Анѓела Јакимовска (24) од Скопје која направи убав успех со пласманот во топ -15 кандидатки и на крајот по бројот на поени од стручното жири го освои одличното 7. место. При тоа и на натпреварот „Head to head Challenge“ ја освои титулата Втора придружничка, каде најважен фактор беше интелигенцијата на девојките.

„Убавиците од целиот свет престојуваа три недели во Албанија, па освен туристичката тура која ја имаа во првите 10 дена, се подготвуваа за големото финале. Изборот по 17. пат во Албанија го организираше Deliart Association, овој пат во услови на пандемија, но како и секогаш максимално професионално и на ниво кое доликува на еден светски избор за убавина“, ни рече Мики Црнокрак, кој веќе 25 години е национален директор за Македонија за изборот за Мис Глоуб.

Победничка на овој избор е претставничката на Косово, Лоринда Колгеци. Прва придружничка е убавицата од Русија, а втора придружничка е од Гана. Македонската претставничка на финалето носеше модели кои сама ги дизајнираше, но и модели од креаторките Лумние Локи и Соња Методиевска.

Post Views: 560