Македонска алијанса за европска интеграција очекува СПАК со приоритет да го истражи незаконското издавање на уверенија за бугарско потекло од албанските локални институции

Македонска алијанса за европска интеграција (МАЕИ) го поздравува изборот на г-дин Клодиан Брахо за нов шеф на Специјалната структура против корупцијата (СПАК). Раководењето со оваа структура претставува висока одговорност и значајна можност за дополнително зајакнување на довербата на граѓаните во правосудството и владеењето на правото во Албанија.

МАЕИ очекува СПАК со приоритет да го истражи незаконското издавање на уверенија за бугарско потекло од албанските локални институции, како и влијанието што групите посредници за бугарски пасоши го извршија врз процесот на пописот во 2023 година на целата територија на Албанија. Овие групи ја злоупотребија својата моќ и врски за да постават свои попишувачи, при што вршеа притисоци, закани и поткуп врз албанските граѓани со цел да ги принудат да се изјаснат како Бугари и да ги манипулираат податоците од пописот.

Дополнително, бараме истрага за незаконските активности на фондациите од Бугарија, кои делуваат со цел асимилација на автохтоната македонска заедница во Албанија, загрозувајќи го нејзиниот идентитет, култура и права.

Последниот попис во Албанија се одвиваше под силни притисоци и директни вмешувања од групи и институции од Бугарија. Пред и за време на пописот, МАЕИ континуирано ги пријавуваше притисоците од посредниците за бугарски пасоши, од Амбасадата на Бугарија, како и од екстремистички групи и различни фондации од Бугарија, кои добија поддршка и од дел албански државни службеници, со јасна цел да се манипулираат резултатите од пописот.

МАЕИ останува посветена на заштитата на правата на македонската заедница во Албанија и на барањето транспарентност и законитост во секој процес што го засега нашиот идентитет и нашата иднина.

Македонска алијанса за европска интеграција (МАЕИ)