Македонско друштво „Илинден“-Тирана по повод одбележувањето на 26 Септември Ден на европските јазици упати честитка, до сите Македонци каде и да се, со порака да го зачуваат мајчиниот јазик зашто тоа е најголемото обележје на националниот идентитет,но и да научат и други јазици затоа што тоа е алатка за стекнување поголемо меѓукултурно разбирање.

Честитајќи ви го денешниот празник, сакаме да го истакнеме значењето на образованието на мајчиниот јазик, бидејќи тоа е најважниот сегмент во негувањето на основните обележја на еден народ. Знаењето и негувањето на мајчиниот јазик за децата значи и јакнење и зачувување на националниот и културен идентитет,стои во честитката на друштвото. Се додава дека важноста на јазичната разновидност и повеќејазичноста е нагласена на европскиот ден на јазиците, кој секоја година се слави со разни настани на 26 септември, по иницијатива на Советот на Европа од 2002 година.

Посочува дека јазичната разновидност е алатка за стекнување поголемо меѓукултурно разбирање и важен дел од богатото наследство на европскиот континент. И по повод овој ден друштвото потсетува дека за жал и во 21 век Македонците во Албанија не може да се образуваат на мајчиниот јазик.

И покрај континураните барања во изминатите три децении од падот на тоталитарниот режим да се овозможи настава на мајчин македонски јазик,сите досегашни албански власи остануваат глуви и слепи на реалноста. Освен за децата во областа Мала Преспа ако и таму нецелосно, настава на македонски јазик нема ниту во Гора, ниту во Голо Брдо, каде што настава на македонски имало до педесетите години од минатиот век,а да не зборуваме за Тирана, Елбасан и други градови каде што живеат илјадници Македонци,- забележува  Македонско друштво „Илинден“-Тирана.