Mинистерот за надворешни работи на Украина на официјална посета на Република Македонија

 

Министерот за надворешни работи на Република Македонија Никола Димитров денес беше домаќин на неговиот украински колега, Павло Климкин, кој престојува во прва официјална посета на Република Македонија. На средбата, министрите разговараа за односите меѓу двете земји и  можностите за натамошно унапредување на билатералната соработка, особено на економски план. Министрите ја реафирмираа заедничката визија за побезбедна и постабилна Европа и меѓусебната поддршка и соработка во остварувањето на надворешно-политичките приоритети на двете земји.

Беше потврден интересот за унапредување на економската соработка, трговијата и деловните врски. Во тој правец, министрите ја потенцираа заедничката определба за што поскорешно потпишување на спогодба меѓу двете земји со која ќе се воведе безвизен режим за краткорочните патувања на граѓаните на двете држави, со што би се поттикнале и олесниле контактите меѓу двете земји. На средбата беа разменети мислења и за европските и евро-атланските аспирации и интеграци на двете земји, како и за други актуелни меѓународни прашања.

По средбата, министрите Димитров и Климкин потпишаа Заедничка декларација меѓу Министерството за надворешни работи на република Македонија и Министерството за надворешни работи на Украина, како и Меморандум за соработка меѓу Дипломатската академија во Министерството за надворешни работи на Република Македонија и Дипломатската академија „Генадиј Удовенко“ во Министерството за надворешни работи на Украина.