МВР и Службен весник со дигитална платформа за брзо објавување изгубени документи и издавање нови

Одделот за информатичка технологија во Министерството за внатрешни работи креираше дигитална платформа за споделување информации за изгубени или одземени документи, со цел нивно публикување во Службен весник.

Министерството за внатрешни работи изјави дека оваа веб-апликација има за цел да ја зголеми продуктивноста и навремената размена на податоци помеѓу институциите, како и да придонесе кон дигитализација на процедурите и услугите за населението, “кои треба да резултираат со побрзи и поефикасни услуги и заштеда на времето на граѓаните кога имаат потреба од услугите на МВР”.

“Со ова решение, досегашната практика на размена на податоци помеѓу МВР и Службен весник по пат на електронска пошта се укинува и врз основа на потпишаниот договор помеѓу МВР и Службен весник, преминува на националната платформа за интероперабилност.”

Преку овој подобрен начин на функционирање, Службен весник секојдневно автоматски ќе ги презема регистрираните изгубени или украдени документи, за да ги објави како неважечки, информираат од МВР.

Тие објаснуваат дека по нивното официјализирање, МВР на идентичен начин, преку националната платформа за интероперабилност, автоматски ќе ги презема објавените невалидни документи од страна на Службен весник и ќе ги надградува во внатрешниот систем, за да им овозможи на граѓаните побрзо да добијат нов документ.