Македонски весник Илинден – Makedonski vesnik Ilinden
Почитувани присутни, драги пријатели, колеги и делегати,
За мене претставува исклучителна чест и задоволство што денес, во името на Општина Пустец и во свое лично име, имам можност да ве поздравам на овој значаен настан – 29-тиот семинар за словенските малцинства во Европа, кој годинава се одржува тука, во Тирана.
Темата на оваа панел-дискусија, „Западен Балкан и неговите национални малцинства на патот кон ЕУ?“, допира до сржта на европските вредности. Кога зборуваме за евроинтеграциите, ние не зборуваме само за политички и економски критериуми; зборуваме, пред сè, за почитување на човековите права, за заштита на идентитетот и за унапредување на положбата на малцинствата како природен мост меѓу државите.
Општина Пустец во Република Албанија е целосно населена со автохтоно, признато македонско национално малцинство кое со векови живее на овој простор, како лојални граѓани на Албанија, но и како чувари на својот македонски код, јазик и традиција. Како пример за практично почитување на малцинските права, во нашите училишта македонскиот јазик е официјално застапен во образовниот процес, а патната и официјалната сигнализација на територијата на целата општина е соодветно испишана на три јазици: албански, македонски и англиски.
Сакам на овој престижен форум да истакнам уште еден многу важен и специфичен факт: целата територија на Општина Пустец целосно се совпаѓа со територијата на Националниот парк „Преспа“. Станува збор за преубав, еколошки чист и магичен крај. Нашата општина ги крие во себе бесценетите природни убавини на Преспанското Езеро, мистичниот и вековен остров Мали Град, како и уникатното културно-историско богатство олицетворено во познатите пештерски цркви кои датираат уште од 14-тиот век.
Но, за да опстои овој рај и за да ги задржиме луѓето на своите огништа, само природните убавини не се доволни. Токму затоа, од оваа говорница сакам да упатам јасен апел, потребно е многу поголемо внимание и конкретна поддршка од страна на албанските централни институции за социо-економскиот развој на Општина Пустец. Инвестициите во инфраструктурата, одржливиот туризам и локалната економија се клучни за нашето малцинство да има сигурна и просперитетна иднина.
Патот на Западен Балкан кон Европската Унија не е комплетен без целосно признавање, но и економски развој на средините каде што живеат националните малцинства. Ние во Пустец покажуваме дека малцинствата не се товар, туку бесценето богатство и додадена вредност за државата во која живеат. Но, за да го сочуваме ова богатство, потребна е континуирана грижа, силна институционална поддршка и будност од сите нас. Овој семинар е вистинското место каде што гласно порачуваме дека малцинските права и економскиот развој одат рака под рака!
Упатувам огромна благодарност до организаторите ФУЕН и АГСМ, како и до Македонското друштво „Илинден“-Тирана за нивната посветеност во организирањето на овој значаен форум. Размената на искуства на овој панел сигурно ќе отвори нови хоризонти за подобра иднина на сите малцинства во регионот.
На крајот, ви посакувам успешна и плодна панел-дискусија. Нека заклучоците од овој 29-ти семинар бидат силен поттик за уште поголеми права, поголема видливост и рамноправно место за малцинствата во големото европско семејство.
Ви благодарам на вниманието!