Од ноќеска почнува летното сметање на времето

На 26-ми март, часовниците треба да се поместат за еден час нанапред, односно времето во два часот ќе се смета како три часот, почнува летното сметање на времето што ќе трае до последната недела на октомври годинава. Преминувањето од зимско на летно сметање на времето и обратно првпат е забележано во 1916 година во државите на северот на Европа и сега се практикува во 70 земји.

Во западна Европа поместувањето на стрелките на часовникот е воведено на почетокот на 70-тите години на минатиот век со образложение дека се „продолжува“ денот, се овозможува заштеда на електрична енергија, се зголемува продуктивноста на работната сила, се подобрува прилагодувањето на луѓето и работниот ден станува поефикасен. Во Македонија, летното сметање на времето првпат е воведено на 27 март 1983 година.