Премиерот на Република Македонија Зоран Заев оствари средба со претставниците на Македонците во Србија

Во рамките на посетата на Република Србија, премиерот на Република Македонија Зоран Заев оствари средба со претставниците на Македонскиот национален совет, како и трите политички партии на Македонците во Србија. На барање на Националниот Совет, Владата на Република Македонија обезбеди книги и литература на македонски јазик за учениците од основните училишта во Република Србија, во кои се изучува предметот „Македонски јазик со елементи на националната култура“. Овие книги и дополнителна литертура ќе им бидат од особено значење за наставата по овој предмет, на учениците меѓу кои најбројни се припадници на македонското национално малцинство, но интерес имаат покажано и ученици од српската, како и од другите националности кои живеат во соседна Србија.

Учебниците, на претставниците на НСМНЗ, што ги предводеше претседателот на советот Борче Величковски, им ги предаде премиерот Зоран Заев, кој во оваа пригода истакна дека оваа средба е добра прилика за разговор од интерес на припадниците на македонската заедница во Република Србија. Премиерот Заев ги информираше присутните на оваа средба дека за ова прашање се разговараше на средбите со премиерката Брнабиќ и со Претседателот на Република Србија Александар Вучиќ, при што е покажан значаен интерес на заедниците на Македонците и на Србите во двете земји, да бидат покренати иницијативи за афирмативно учество на овие заедници во општествените процеси во Македонија и Србија. Претседателот на Владата на Република Македонија ги запозна присутните со економските програми на владата и ги охрабри бизнисмените Македонци во Србија да пронајдат интерес и партнери во Република Македонија за заеднички бизнис иницијативи.

Претседателот на Македонскиот национален совет Борче Величковски ја истакна потребата што побрзо да почне да се спроведува Меѓудржавната спогодба за заштита на македонското национално малцинство во Србија и на српското национално малцинство во Македонија, ратификувана во двата собранија уште во 2005 година, а за што е потребно македонската влада да именува членови на Меѓувладината мешовита комисија која ќе го имплементира овој билатерален договор. Побарана е и поддршка за отворањето на Заводот за заштита на македонската култура на овие простори, како и за подигнување на прв споменик на Македонците во Панчево.

Премиерот Заев, и членовите на владината делегација во официјалната посета на Република Србија, со внимание ги проследија излагањата на претставниците на националните совети на заедниците на Македонците во Србија, и изразија подготвеност со внимание да им пристапат на предлозите искажани на оваа средба, особено во делот на образованието и во сферата на културата. Премиерот Заев ги повика македонските здруженија да ги надминат разликите во име на обединување на интересите за граѓаните со потекло од Република Македонија./www.nsmakedonaca.org.rs