Советот на ЕУ ги усвои новите правила за суспендирање на безвизен режим

ЕУ денес конечно ги ратификуваше промените во Правилникот за механизмот за одложување на безвизниот режим за граѓаните на трети држави кои не бараат виза за патување во Шенген зоната. Ова ќе и овозможи на Унијата побрз и поодлучен одговор во ситуации на злоупотреба на овој режим или ако истиот ги загрозува нејзините интереси.

Според изменетите прописи, ЕУ има право да го укине безвизниот режим за трета држава, доколку таа не е во согласност со визните политики на блокот или ако практикува програма за давање државјанства на инвеститори кои немаат реална поврзаност со неа.

Покрај тоа, како причина за прекин на безвизниот режим може да послужи и влошување на односите меѓу ЕУ и засегнатата земја, или пак случаи на тешко кршење на човековите права.

Согласно новите промени во Правилникот, безвизниот режим за трета држава може да биде прекинат и доколку има забележително зголемување на случаите на одбиен влез и на надминување на дозволениот период на престој, како и зголемување на барањата за азил и на тешки кривични дела извршени од нејзини државјани.

Досегашниот Механизам предвидуваше дека првичната суспензија на безвизниот режим може да трае до девет месеци, со опција за продолжување за уште 18. Сега, со измените, овие рокови се продолжуваат на 12 месеци за првично одложување и продолжување за дополнителни 24 месеци.

Изменетиот Правилник за механизмот за суспензија на визите ќе стапи на сила 20 дена по неговото објавување во Службениот весник на ЕУ и веднаш ќе стане задолжителен за сите земји-членки на Унијата.