Доживотен имунитет за претседателот на Русија и за неговото семејство

Долниот дом на рускиот парламент го поддржа законот со кој се обезбедува имунитет на претседателот на државата и на членовите на неговото семејство, дури и по напуштањето на таа позиција, пренесува Би-би-си. Таквата одредба е вклучена и во Уставот на Русија, чии амандмани беа прифатени на референдумот одржан во јули. Четвртиот мандат на Путин на чело на Русија истекува во 2024 година, а измените и дополнувањата на Уставот ќе му овозможат уште два мандата.

Законот го помина првото читање денес во Думата, во која мнозинство има Единствена Русија, чијшто претседател е премиерот Дмитриј Медведев. Комунистите во Думата имаат 37 пратеници, кои гласаа против законот. Доколку законот помине во следните две читања, тој ќе биде проследен до Горниот дом на парламентот за усвојување.

Доколку се донесе законот, претседателот на Русија и членовите на неговото потесно семејство ќе имаат доживотен имунитет, но ќе може да им се суди за кривично дело предавство. Освен Путин, кога тој ќе замине од власта, законот ќе се однесува и на Медведев, кој беше и претседател на Русија, но не и за Михаил Горбачов, бидејќи тој беше на чело на Советскиот сојуз.

Advertisement