Македонците во Албанија во село Горно Крчиште областа Полени го прославија празникот Спасовден, се одржа 12-та традиционална средба на Македонците во село Горно Крчишта. Во близина на Дебар се наоѓа граничниот премин Блато, а од другата страна на границата е Албанија. Најголемото населено место по патот е Макеларе, а на неколку километри од него, во пазувите на планината Крчин се наоѓа селото Горно Крчиште. Тоа е родното село на бројни македонски интелектуалци, чесни работници и искрени патриоти. Во село Крчиште има пет цркви, а најмаркантни се Свети Спас и Свети Димитрија. Црквата Свети Спас  е споменик на културата во Албанија бидејќи според иконописот и градбата таа е стара 700 години.

Сепак, ни најмалку не го добива потребното внимание и одржување од страна на албанската држава. Напротив, за таа црква како и за соборниот храм Свети Димитрија се грижат само Македонците кои потекнуваат од ова село. Во чест на Свети Спас, домародните жители како и оние кои се исселени од селото, се собираат на заедничка средба секоја прва сабота после големиот православен празник Свети Спас. Така и оваа година, се одржа традиционалната средба на Македонци исселени од село Крчишта пред многу години. Средбата традиционално беше збогатена со обред на православен поп кој ги отпеа црквите и гробиштата, а присутните ја вртеа и поделија погачата подготвена од организаторите. Во пријатна атмосфера, Македонците од Крчишта поминаа еден убав ден евоцирајќи спомени за минатите средби, како и за починатите Крчиштани во минатата година, оддавајќи им должна почит.