Сочувство од Македонска Алијанса за загинатите и повредените во земјотресот во Албанија

Со длабоко жалење ги проследив информациите за страшните последици од земјотресот во Драч и другите места во Албанија. Од мое лично име и од името на целата на Македонска Дијаспора упатувам сочувство Вам како Претседател и до семејствата на загинатите, како и кон оние што трагаат по своите најблиски, а на повредените им посакувам побрзо оздравување.

За жал, природата неретко знае сурово да се однесува кон цивилизацијата. Елементарните непогоди не може да се контролираат и често ни покажуваат колку е кршлив човечкиот живот и колку е ранлив и модерниот свет.

Верувам дека сите надлежни институции во Албанија ќе реагираат соодветно и ќе успеат да ги спасат луѓето кои се заглавени под урнатините. Република Македонија има тажно искуство со земјотресот во Скопје кога во 1963 загинаа 1100 жители, 3000 беа повредени, а 200 илјади останаа без своите домови. Ние најдобро сме почувствувале што значи солидарноста за една нација во вакви траорни моменти.

Мои искрени и почитувани пријатели, повеќе сум од сигурен дека народот на Албанија, помогнат од целиот свет, ќе ги надмине овие тешки моменти и уште еднаш ја изразувам мојата поддршка и охрабрување за справување со оваа криза. Во овие тешки моменти срцата на Македонската нација се со вас! стои во писмото потпишано од Претседателот на Македонска Алијанса, Ѓорѓи Џорџ Атанасоски.