Стерјовски и заблагодари на албанската Влада за вклучувањето на општините Пустец и Поградец во програмата за интегриран регионален развој (ВИДЕО)

Пратеникот од Македонска алијанса за европска интеграција, во албанскиот парламент, Васил Стерјовски, на денешната пленарна седница го поддржа Предлог – законот „За ратификација на договорот меѓу Советот на министри на Република Албанија и Владата на Сојузна Република Германија”, за инвестициската програма за интегриран регионален развој. Ова програма предвидува интегрирани инфраструктурни зафати, во функција на поттикнување на економскиот развој на областите со туристички потенцијал и вклучува интервенции во три општини Пустец, Подградец и Химара.

Како пратеник од округот Корча и благодарам на Владата за вклучувањето на општините Пустец и Поградец во ова програма, како две општини со слични карактеристики, каде како главен потенцијал е езерскиот туризам. За областа Преспа од овој проект се планираат да се инвестираат околу 10 милиони евра за рехабилитација на рурални патишта, изградба на шеталишта и велосипедски патеки покрај Преспанското Езеро, изградба на плажи и слично, информираше за МИА, Стерјовски.

Додава дека главниот проблем во социо-економскиот развој на областа Преспа не бил недостаток на инвестиции или недостаток на проекти за развој на областа, туку неспроведување или неправилна реализација на одобрените проекти за областа. Затоа, жителите на македонската заедница во областа Преспа со право очекуваат овие инвестиции да бидат правилно менаџирани за да се претвори областа Преспа во вистинска туристичка дестинација, посочи тој.