Во Голо Брдо земјотресот предизвика поголеми оштетувања на дваесеттина куќи

Серијата земјотреси, со епицентар во селото Топојани во близина на пограничното градче Булќиза, каде припаѓа и областа Голо Брдо, предизвикаа материјална штета кај повеќе индивидуални куќи и во оваа област, која е на самата албанско-македонска граница, кај Дебар.

Со помали оштетувања се повеќе куќи во неколку села, додека со поголеми се дваесеттина и тоа во селата Требиште, Острени и Клење. Станува збор за постара градба. Посебни оштетувања предизвика земјотресот во петокот во 8:10 часот, кој беше со јачина од 4,5 степени според Рихтеровата скала, изјави за МИА, Едмонд Османи, администратор на административната единица Требиште.

Според него евидентирани се сите сопственици чии домови се со поголеми оштетувања и се пријавени до локалната власт на Булќиза.

Додава дека комисијата за процена на штетата треба да пристигне деновиве и нагласува дека од градоначалникот Лефтер Ала и од владата на премиерот Еди Рама веќе е најавена помош за санирање на штетите.

Албанските медиуми пренесуваат дека во цела општина Булќиза, која припаѓа на околијата Пешкопеја (Долни или Мал Дебар) материјална штета е предзвикана на најмалку 100 објекти, но за среќа нема целосно оштетни куќи.