Тоа предизвикуваат изјавите на премиерот на Албанија Еди Рама и на „шефот“ на еднострано прогласеното независно Косово Хашим Тачи за подготвеноста да се обединат во една големоалбанска држава. Со нив се согласува и раководителот на јужната српска општина населена со Албанци Прешево Ј. Муслиу, кој изјави желба територијата на општината да влезе во состав на таквата творба. Во истиот контекст е фамозната „тиранска платформа“ на албанските етнички партии во Македонија, која води кон поткопување на нејзината државност“.
Во соопштението на МНР на Руската Федерација се вели дека „главните покровители на Тирана и Приштина – САД и ЕУ – или срамежливо премолчуваат или се оградуваат со општи фрази кои ништо не значат“. Москва се согласува со осудите од страна на српскиот премиер Вучиќ и шефот на српската дипломатија Дачиќ на реториката на албанските политичари и барањето соодветна реакција на она што се случува од Брисел, Вашингтон и клучните европски метрополи.
„Сметаме дека е неопходно меѓународната заедница консолидирано да им укаже на Тирана и на албанските политичари во другите балкански земји на неприфатливоста на промовирањето територијални претензии и дискусиите за прекројување на границите во регионот“.
Москва апелира до западните партнери да се раководат „според меѓународното право и здравиот разум, а не според вообичаените шеми на двојни стандарди“, се вели во соопштението на Министерството за надворешни работи на Русија.